ᐃᓄᓕᖅᑕᐃᑦ ᐅᓯᔭᐅᖃᑦᑕᕐᓂᖏᑦ

ᓇᓗᓇᐃᔭᐃᔾᔪᑎ

ᓄᓇᕗᒻᒥ, ᐋᖅᑭᐅᒪᔾᔪᑏᑦ ᓴᓇᔭᐅᕙᓪᓕᐊᔪᑦ ᑐᕌᖅᑕᖃᕐᓂᖅᓴᐅᒻᒪᑕ ᐅᓇᓖᑦ ᐱᔪᒪᔭᕆᖏᓐᓂᒃ, ᐅᕝᕙᓘᓐᓃᑦ ᐋᑐᑎᓕᓐᓂᒃ ᐲᔭᐃᓂᖅ, ᐱᓇᓱᐊᖔᕋᑎᒃ ᐱᔭᕆᐊᓕᓐᓂᒃ ᒪᑯᓂᖓ ᓴᓗᒪᔪᒥᒃ ᐃᒪᖃᕐᓂᕐᒥᒃ, ᓂᖀᑦ, ᐃᓪᓗᐃᑦ, ᐃᖅᑲᓇᐃᔮᓪᓗ ᑲᔪᓯᓂᖃᑦᓯᐊᖅᑐᑦ. ᖃᐅᔨᓴᕐᓂᕋ ᕿᒥᕐᕈᔪᖅ ᖃᓄᖅ ᐃᓄᐃᑦ ᕿᑭᖅᑕᓂᖅᐸᓯᑦᑐᑦ ᓄᓇᕗᒻᒥ ᑕᑯᓐᓈᕐᒪᖔᑕ ᓯᕗᓂᑦᓴᖏᓐᓂᒃ ᓄᓇᓕᖏᑦᑕ ᖃᓄᕐᓗ ᑕᒪᓐᓇ ᑲᓲᒪᓂᖃᕐᒪᖔᖅ ᐃᖏᕐᕋᔾᔪᑏᑦ ᐱᕙᓪᓕᐊᓂᖏᓐᓄᑦ. ᑕᑯᓐᓈᖅᑕᕋ ᑲᓲᒪᓂᖓ ᐃᖏᕐᕋᔾᔪᑏᑦ ᐃᓄᖅᑕᐃᓪᓗ ᓂᖀᑦ, ᖃᓄᕐᓗ ᑕᒪᓐᓇ ᐊᑦᑐᐃᓂᖃᕐᓂᐊᕐᒪᖔᖅ ᓄᓇᕗᑦ ᓯᕗᓂᑦᓴᖓᓂᒃ. ᓄᓇᓕᓖᑦ ᖃᐅᔨᒪᓕᑕᐅᓯᒪᔪᑦ ᑕᒪᑦᓱᒧᖓ ᖃᐅᔨᓴᕐᓂᕐᒧᑦ. ᑕᑯᑦᓴᐅᑎᑦᓯᓯᒪᔪᖅ ᖃᓄᖅ ᖃᓄᖅᑑᖅᑏᑦ ᐃᑲᔪᖅᑐᓂᖅᓴᐅᒍᓐᓇᕐᒪᖔᑕ ᓄᓇᓕᓐᓂ ᑭᙴᒪᒋᔭᐅᔪᓂᒃ, ᐊᖑᓇᓯᑦᑎᓂᒃ, ᓂᕿᑦᓴᖅᓯᐅᖅᑎᓂᒃ, ᐊᒻᒪᓗ ᑕᐃᒃᑯᓇᙵᑦ ᓱᖏᖅᑑᑎᖃᖅᐸᑦᑐᓂᒃ ᐃᓄᓕᖅᑕᓂᒃ ᓂᕿᓂᒃ.

ᖃᓄᖅ ᐊᐅᓚᓂᖃᖅᓯᒪᒻᒪᖔᖅ ᖃᐅᔨᓴᕐᓂᕋ

ᓯᕗᓪᓕᖅᐹᒥ ᐃᖃᓗᓕᐊᓚᐅᖅᓯᒪᔪᖓ ᒥᑦᑎᒪᑕᓕᒻᒧᓪᓗ ᒪᐃ ᐊᒻᒪᓗ ᔫᓂ 2022−ᒥ. ᐅᖃᖃᑎᒋᓚᐅᖅᓱᒋᑦ ᓄᓇᓕᓖᑦ ᓄᓇᓕᓐᓂ ᑎᒥᐅᔪᑦ ᓱᓇᒥᒃ ᐃᓱᒫᓘᑎᖃᓂᖅᐸᐅᒻᒪᖔᑕ, ᓂᕈᐊᖅᓯᒪᕗᖓ ᑕᑯᓐᓇᓂᖅᓴᐅᒍᒪᓪᓗᖓ ᖃᓄᖅ ᐃᖏᕐᕋᔾᔪᑏᑦ ᐊᑦᑐᐃᓂᖃᕐᒪᖔᑕ ᓂᕿᑦᓴᖃᑦᓯᐊᑦᓯᕐᓂᕐᒥᒃ. ᖃᐅᔨᓴᕐᓂᕐᒧᑦ ᓚᐃᓴᓇᓯᑖᑐᐊᕋᒥ ᓄᓇᕗᒻᒥ ᖃᐅᔨᓴᖅᑐᓕᕆᔨᒃᑯᓐᓂᒃ, ᑲᔪᓯᒍᑎᓚᐅᖅᓯᒪᔭᕋ ᖃᐅᔨᓴᕐᓂᕋ ᐊᐅᒡᒍᓯ 2022−ᒥᒃ ᑏᓯᐱᕆ 2023−ᒧᑦ. ᐱᖓᓱᐊᖅᑎᖅᓱᖓ ᓂᐅᕐᕈᖃᑦᑕᖅᓱᖓ, ᑲᑎᑦᓱᑎᒃ ᑕᖅᑮᑦ 12, ᐱᓕᕆᔪᕗᖓ ᓄᓇᓕᓐᓂ ᑕᓪᓕᒪᓂ: ᐃᖃᓗᐃᑦ, ᑭᒻᒥᕈᑦ, ᒥᑦᑎᒪᑕᓕᒃ, ᖃᐅᓱᐃᑦᑐᖅ ᐊᒻᒪᓗ ᐊᐅᓱᐃᑦᑐᖅ.

ᓂᐅᕐᕈᖃᑦᑕᔪᔪᖓ ᒪᕐᕈᐊᖅᑎᖅᓱᖓ ᓄᓇᓕᓐᓄᑦ, ᑲᑎᒪᔪᓕᐊᖅᐸᑦᓱᖓ, ᑲᑎᒪᔪᓄᑦ ᐃᓕᓐᓂᐊᓯᓐᓈᖅᓱᑎᒃ, ᐱᖅᑯᓯᕐᓅᖓᔪᓄᑦ ᐊᐅᓚᓂᐅᔪᓄᑦ, ᐊᖑᓇᓱᑦᑐᓄᑦ, ᑕᑯᓐᓇᑎᑦᓯᔪᓄᑦ, ᐊᒻᒪᓗ ᐱᙳᐊᕕᒻᒥ ᑲᑎᒪᑎᑦᓯᓂᐅᔪᓄᑦ. ᐃᑲᔪᖃᑦᑕᖅᓯᒪᒻᒥᔪᖓ ᐊᑭᓕᖅᑐᖅᑕᐅᓇᖓ ᓄᓇᓕᓐᓂ ᓂᕿᑖᕐᕕᒻᒥ, ᐸᕐᓇᐃᖅᓯᒪᑦᓱᖓ ᓯᕗᓂᑦᑎᓐᓂ ᐸᕐᓇᑕᐅᔪᓂᒃ ᑲᑎᒪᓯᓐᓈᑦ ᐃᓕᓐᓂᐊᕐᓂᐅᔪᓂ, ᑲᑎᒪᑎᑦᓯᕙᑦᓱᖓᓗ. ᑲᑎᑦᓱᑎᒃ, ᐊᐅᓚᑦᓯᓯᒪᔪᖓ 170−ᓂᒃ ᐊᐱᖅᓱᕐᓂᐅᔪᓂᒃ, 60 ᐅᖓᑖᓃᑦᑐᑦ ᓂᐱᓕᐅᖅᑕᐅᓯᒪᑦᓱᑎᒃ. ᐅᖃᖃᑎᖃᖅᓯᒪᔪᖓ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑎᒪᔨᖏᓐᓂᒃ, ᒐᕙᒪᒃᑯᖏᓐᓂᒃ ᓄᓇᕗᑦ, ᐃᓄᐃᑦ ᑎᒥᖁᑎᖏᓐᓂᒃ, ᓄᓇᓕᓐᓂ ᑮᓇᐅᔭᓕᐅᕋᓱᐊᖅᑎᐅᖏᑦᑐᓂᒃ, ᓯᓚᑦᑐᓴᕐᕕᓐᓂ ᐃᖅᑲᓇᐃᔭᖅᑎᓂᒃ, ᒥᕝᕕᒻᒥ ᐃᖅᑲᓇᐃᔭᖅᑎᓂᒃ, ᓯᔾᔭᐅᒥᐅᑕᓕᕆᔨᓂᒃ, ᐃᓕᓐᓂᐊᖅᑎᓂᒃ, ᑎᑭᕋᑖᓂᓪᓗ ᓄᓇᓕᐅᖃᑕᐅᓕᖅᑐᓂᒃ.

ᓱᒻᒪᑦ ᑕᒪᓐᓇ ᖃᐅᔨᓴᕐᓂᖅ ᐊᑑᑎᖃᕐᒪᖔᖅ

ᓂᕿᑦᓴᖃᑦᓯᐊᕐᓂᖅ − ᐱᔪᓐᓇᐅᑎᖃᕐᓂᖅ ᐊᐅᓚᑦᓯᓂᕐᒧᑦ ᓄᓇᓕᓐᓂ ᓂᖀᑦ ᐊᐅᓚᓂᖏᓐᓂᒃ − ᐱᒻᒪᕆᐊᓗᒃ ᓄᓇᕗᒻᒥ. ᓂᐅᕕᕐᕕᒻᒥᒃ ᓂᐅᕕᐊᖑᕙᑦᑐᑦ ᓂᖀᑦ ᐊᑭᑐᔪᐊᓗᐃᑦ ᐊᑐᐃᓐᓇᐅᒐᔪᐃᑦᓱᑎᓪᓗ, ᐃᓄᓕᖅᑕᐃᑦ ᐊᑑᑎᖃᓪᓚᕆᑦᓱᑎᒃ. ᑭᓯᐊᓂ ᐱᓇᓱᐊᕐᓂᖅ, ᑐᓂᐅᖅᑲᐃᓂᕐᓗ ᐃᓄᓕᖅᑕᓂᒃ ᓱᖏᖅᑑᑎᖃᕐᒪᑦ ᐃᖏᕐᕋᔾᔪᑎᓂᒃ, ᐅᖅᓱᐊᓗᐃᑦ ᐊᑭᖏᓐᓂᒃ, ᒐᕙᒪᒃᑯᖏᑦ ᐊᑐᐊᒐᖏᓐᓂᒃ, ᓯᓚᐅᓪᓗ ᐊᓯᔾᔨᐸᓪᓕᐊᓂᖓᓂᒃ.

ᑕᒪᓐᓇ ᑕᑯᑦᓴᐅᑎᑦᓯᔪᖅ ᖃᓄᖅ ᐃᖏᕐᕋᔾᔪᑏᑦ ᐃᑲᔪᕐᓂᖃᕈᓐᓇᕐᒪᖔᑕ ᓄᓇᓕᓐᓂ ᓂᖀᑦ ᐊᐅᓚᓂᖏᓐᓂᒃ ᖃᐅᔨᓴᑦᓯᐊᕐᓂᐅᖅᓱᓂᓗ ᓄᓇᕗᒻᒥ ᓂᓪᓕᐊᒍᑕᐅᔪᑦ ᑐᓴᖅᑕᐅᓕᕋᓗᐊᕐᒪᖔᑕ. ᑖᒃᑯᐊ ᑐᑭᓯᔭᐅᔪᑦ ᐊᕕᑦᑐᖅᓯᒪᔪᑦ ᓯᑕᒪᐅᑦᓱᑎᒃ ᐃᓗᓕᖏᑦ.

• ᓂᕿᑦᓴᖃᑦᓯᐊᕐᓂᖅ ᐊᑐᐃᓐᓇᖃᕐᓂᕐᓗ ᐃᓄᓕᖅᑕᓂᒃ – ᐊᑦᓱᕈᕐᓇᖅᑐᑦ ᐱᒐᓱᐊᕐᓗᓂ ᑐᓂᐅᖅᑲᐃᓂᕐᓗ ᐃᓄᓕᖅᑕᓂᒃ ᓂᕿᓂᒃ.

• ᐃᖏᕐᕋᔾᔪᑎᑦ ᐊᑦᑐᐃᓂᖓ ᓂᕿᑦᓴᖃᑦᓯᐊᕐᓂᕐᒥᒃ – ᖃᓄᖅ ᖃᖓᑕᔫᒃᑯᑦ, ᐅᒥᐊᕐᔪᐊᒃᑯᑦ ᓄᓇᒃᑯᓪᓗ ᐃᖏᕐᕋᔾᔪᑏᑦ ᐊᑦᑐᐃᓂᖃᕐᓂᕐᓂᖏᑦ ᓂᕿᓂᒃ, ᓱᓇᒃᑯᑎᓂᒃ, ᐃᓄᓐᓂᓪᓗ.  

• ᑮᓇᐅᔭᓕᐅᓂᕐᒨᖓᔪᑦ ᐊᑐᐊᒐᕐᓄᓪᓗ ᐃᓱᒫᓘᑏᑦ – ᖃᓄᐃᓕᖓᓂᖏᑦ ᒐᕙᒪᒃᑯᓐᓂ ᐊᐅᓚᓂᐅᔪᑦ, ᐃᑲᔫᑏᑦ, ᐊᒻᒪᓗ ᓄᓇᓕᓐᓂ ᐱᓇᓱᐊᕐᓂᐅᔪᑦ ᓂᕿᑦᓴᖃᑦᓯᐊᕐᓂᕐᒨᖓᔪᑦ ᐃᖏᕐᕋᔾᔪᑎᓄᓪᓗ.

• ᓯᕗᓂᕐᒧᑦ ᐸᕐᓇᐅᑏᑦ ᓄᓇᓕᓐᓂᓪᓗ ᓯᕗᓪᓕᐅᑎᔭᐅᔪᑦ − ᐃᓱᒪᑦᓴᖅᓯᐅᕈᑎᑦᓴᐃᑦ ᓴᙱᓕᖅᐹᓪᓕᑎᑦᓯᓂᕐᒧᑦ ᓄᓇᕗᒻᒥ ᓂᕿᓅᖓᔪᓄᑦ ᐃᖏᕐᕋᔾᔪᑎᓄᓪᓗ ᓯᕗᓂᑦᑎᓐᓂ.

ᑐᑭᓯᓂᖅ ᑖᒃᑯᐊ ᐃᓗᓕᖏᓐᓂᒃ ᐃᑲᔪᕐᓂᖃᖅᑐᖅ ᖃᐅᔨᓴᑦᓯᐊᕈᑕᐅᓗᓂ ᓄᓇᕗᒻᒥ ᐋᖅᑭᐅᒪᔾᔪᑏᑦ ᑎᑭᐅᑎᓯᒪᒐᓗᐊᕐᒪᖔᑕ ᓄᓇᓕᓐᓂ ᑭᙴᒪᒋᔭᐅᔪᓄᑦ. ᓈᓚᓐᓂᖅ ᓄᓇᓕᓕᓐᓂᒃ ᐱᕚᓪᓕᑎᑦᓯᒍᓐᓇᖅᑐᖅ ᓂᕿᑦᓴᖃᑦᓯᐊᕐᓂᕐᒥᒃ, ᐃᑲᔪᖅᑐᐃᓂᖅ ᑲᔪᓯᔪᓂᒃ ᐃᖏᕐᕋᔾᔪᑎᓂᒃ, ᐋᖅᑭᑦᓱᐃᕙᓪᓕᐊᓗᓂᓗ ᓯᕗᓂᕐᒥᒃ ᐊᑦᑐᐊᓂᖃᖅᑐᒥᒃ ᓄᓇᕗᒻᒥᐅᓄᑦ ᓯᕗᓪᓕᐅᑎᔭᐅᔪᓄᑦ.

ᖃᐅᔨᔭᓪᓗᐊᑕᐃᑦ ᐸᕐᓇᐅᑏᓪᓗ

ᓂᕿᑦᓴᖃᑦᓯᐊᕐᓂᖅ ᐊᑐᐃᓐᓇᖃᕐᓂᕐᓗ ᐃᓄᓕᖅᑕᓂᒃ ᓂᕿᓂᒃ

ᓂᕿᑦᓴᖃᑦᓯᐊᕐᓂᖅ ᑐᑭᓕᒃ ᐊᑐᐃᓐᓇᖃᕐᓂᖅ ᖃᓄᐃᙱᓯᐊᖅᑐᓂᒃ, ᐱᖅᑯᓯᕐᒧᑦ ᓈᒻᒪᓈᖅᓯᒪᔪᓂᒃ ᓂᕿᓂᒃ. ᐃᓄᓕᖅᑕᐃᑦ ᓂᕿᑦᓯᐊᕙᑐᐃᓐᓇᐅᖏᑦᑐᑦ; ᑲᓲᒪᑎᑦᓯᔪᖅ ᐃᓄᓐᓂᒃ ᐱᖅᑯᓯᕐᒥᓄᑦ ᓄᓇᓕᒻᒥᓄᓪᓗ. ᑭᓯᐊᓂᓕ, ᐊᑐᐃᓐᓇᖃᕐᓂᖅ ᐃᓄᓕᖅᑕᓂᒃ ᓂᕿᓂᒃ ᐊᑦᑐᖅᑕᐅᓯᒪᔪᖅ ᐃᖏᕐᕋᔾᔪᑎᓄᑦ ᐋᖅᑭᐅᒪᔾᔪᑎᓄᓪᓗ.

ᐊᑦᓱᕉᑎᓪᓗᐊᑕᐃᑦ:

• ᐊᐳᖅᑕᕈᑏᑦ ᐊᑐᐃᓐᓇᖃᕐᓂᕐᒧᑦ: ᐃᓄᓕᖅᑕᑖᕋᓱᐊᕐᓂᖅ ᐱᔭᕆᐊᑐᔪᖅ ᓴᙲᓐᓂᖓᓄᑦ ᒪᓂᒪᑎᑦᓯᔪᑦᓴᐃᑦ ᑲᓲᒪᔪᑦ, ᑐᓂᒪᓂᓕᓐᓂᒃ ᓂᐅᕕᕐᕕᑦᑕᖃᙱᑦᑐᖅ, ᓇᓗᓇᖅᑐᖅ ᖃᓄᖅ ᑲᓱᕋᓱᐊᕆᐊᑦᓴᖅ ᓂᐅᕕᐊᑦᓴᓕᓐᓄᑦ (ᖃᕆᑕᐅᔭᒃᑰᕈᑎᖃᙱᒧᑦ ᑮᓇᐅᔭᖃᙱᓂᕐᒧᓪᓘᓐᓃᑦ), ᐊᒻᒪᓗ ᐊᒥᒐᖅᓱᑎᒃ ᓂᕐᔪᑏᑦ (ᓲᕐᓗ ᑐᒃᑐᐃᑦ, ᑑᒑᓖᑦ ᕿᓚᓗᒐᐃᑦ, ᐅᒥᖕᒪᐃᑦ).  

• ᐊᑭᑐᔪᖅ ᐊᖑᓇᓱᐊᕐᓂᐊᕐᓗᓂ: ᐊᖑᓇᓐᓂᖅ ᐊᑭᑐᔪᖅ, ᐱᔭᕆᐊᑦᑐᐃᓯᒪᑦᓱᓂ ᓄᓇᓕᓕᓐᓄᑦ ᓱᓇᒃᑯᑎᑖᕋᓱᐊᕆᐊᑦᓴᖅ ᐃᖅᑲᓇᐃᔭᙱᑲᐃᓐᓇᕆᐊᑦᓴᓘᓐᓃᑦ. ᐊᐅᓚᓂᐅᑕᐅᔪᑦ ᓲᕐᓗ ᓄᓇᕗᑦ ᑐᙵᕕᒃᑯᓐᓂ ᓄᓘᔮᓐᓂᓪᓗ ᒑᓯᑖᕈᑏᑦ ᓄᓇᕗᒻᒥᓗ ᐊᖑᓇᓱᑦᑎᓂᒃ ᐃᑲᔫᑏᑦ ᐃᑲᔪᕐᓂᖃᖅᑑᒐᓗᐊᑦ, ᑭᓯᐊᓂ ᐃᑲᔪᖅᑐᖅᑕᐅᒃᑲᓐᓂᕆᐊᓖᑦ.  

• ᐊᑦᓱᕈᕐᓇᕈᑎᖏᑦ ᓂᐅᕕᐊᑦᓴᖃᕐᓂᐅᑉ ᐃᓄᓕᖅᑕᓂᒃ: ᓂᐅᕕᖅᑎᑦᓯᓂᖅ ᐃᓄᓕᖅᑕᓂᒃ ᒪᓕᒐᕐᓂᒃ ᓯᖁᒥᑦᓯᖏᑦᑑᒐᓗᐊᖅ ᑭᓯᐊᓂ ᐱᔭᕆᐊᑐᔪᖅ ᐊᑭᑐᔪᐊᓘᒻᒪᑕ ᐅᓯᔭᐅᔾᔪᑎᖏᑦ ᐊᒥᓲᒐᑎᓪᓗ ᐃᑲᔫᑏᑦ. ᐃᓚᖏᑦ ᐃᓄᐃᑦ ᓈᒻᒪᓴᙱᑦᑐᑦ ᓂᐅᕕᐊᑦᓴᓕᓐᓂᒃ ᑐᓂᓯᑐᐃᓐᓇᕋᑎᒃ, ᑭᓯᐊᓂ ᓂᐅᕕᐊᑦᓴᖃᕋᔪᑉᐸᓪᓕᐊᑐᐃᓐᓇᓕᖅᑐᑦ. ᑭᓯᐊᓂᓕ, ᐃᓄᓕᖅᑕᐃᑦ ᐊᐅᓪᓚᖅᑎᑕᐅᔪᑦ ᑭᖑᕙᐅᖅᑲᑎᑕᐅᒐᔪᓲᑦ, ᔭᒐᓲᑦ, ᓱᕋᑦᑎᓲᑦ ᐊᑭᓕᖅᑕᐅᔾᔮᒐᑎᒃ.  

• ᓄᓇᓕᓐᓂ ᖁᐊᒃᑯᕖᑦ ᓂᕿᒃᑯᕖᓪᓗ: ᑖᒃᑯᐊ ᐱᒻᒪᕆᐊᓗᐃᑦ ᑭᓯᐊᓂᑦᑕᐅᖅ ᓱᖏᖅᑑᑎᑦᓴᐅᖏᑦᑐᑦ ᒪᑭᒪᔭᕆᐊᖃᕐᒪᑕ ᓴᓇᔭᐅᕙᓪᓗᑎᓪᓗ ᐃᓂᑭᑦᓱᑎᓪᓗ. ᖁᐊᒃᑯᕖᑦ ᓱᕋᒻᒪᑕ, ᐊᑦᑐᐃᓂᖃᓲᑦ ᓂᕿᒃᑯᕕᓐᓂᒃ. ᓯᓚ ᐊᓯᔾᔨᐸᓪᓕᐊᑐᐃᓐᓇᑎᓪᓗᒍ, ᓱᖏᖅᑑᑎᑦᓴᐃᑦ ᖁᐊᒃᑯᕖᑦ ᐱᒻᒪᕆᕈᖅᐸᓪᓕᐊᑐᐃᓐᓇᖅᑐᑦ.

ᐃᖏᕐᕋᔾᔪᑎᓄᑦ ᐋᖅᑭᐅᒪᔾᔪᑏᑦ ᐊᑦᑐᐃᓯᒪᓂᖏᓪᓗ ᓂᕿᑦᓴᖃᑦᓯᐊᕐᓂᕐᒥᒃ

ᐃᖏᕐᕋᔾᔪᑏᑦ ᐱᒻᒪᕆᐊᓗᕗᑦ ᑕᒪᒃᑮᓐᓄᑦ ᐅᓯᖃᑦᑕᕐᓂᕐᒧᑦ ᓂᐅᕕᕐᕕᒻᒥᒃ ᓂᕿᑖᒥᓂᕐᓂᒃ ᐃᓄᓕᖅᑕᓂᓪᓗ. ᑭᓯᐊᓂᓕ, ᐅᖓᓯᓐᓂᖅ, ᓯᓚᕐᓂᓪᓗᖃᑦᑕᕐᓂᖅ, ᐊᒻᒪᓗ ᐊᒥᒐᖅᑐᒥᒃ ᐋᖅᑭᐅᒪᔾᔪᑎᖃᕐᓂᖅ ᑕᒪᑦᓱᒥᖓ ᐱᔭᕆᐊᑦᑐᐃᓯᒪᒻᒪᑦ.  

ᐊᑦᓱᕉᑎᓪᓗᐊᑕᐃᑦ:

• ᓱᖏᖅᑑᑎᑦᓴᐅᖏᑦᑐᑦ ᐃᖏᕐᕋᔾᔪᑏᑦ: ᖃᖓᑕᔫᑦ ᐅᒥᐊᕐᔪᐊᓪᓗ ᑭᖑᕙᐅᖃᖅᑲᒐᔪᓲᖑᒻᒪᑕ ᐱᔾᔪᑕᐅᓪᓗᓂ ᓯᓚ, ᐊᐅᓚᐅᓪᓗᐊᕿᓂᖅ, ᐊᒻᒪᓗ ᐊᑭᓕᕋᑦᓴᐃᑦ ᐊᑭᑐᓂᖏᑦ.  

• ᒥᕝᕖᑦ, ᖃᖓᑕᔫᓪᓗ: ᖃᓄᐃᑦᑐᓂᖓ ᒥᕝᕕᐅᑉ (ᑐᐊᐸ ᖁᐊᖅᑎᑕᒐᕐᓗᓐᓃᑦ) ᐊᑦᑐᐃᓂᖃᓲᖑᒻᒪᑦ ᖃᓄᐃᓪᓗᐊᕈᓐᓇᕐᓂᖏᓐᓂᒃ ᖃᖓᑕᔫᑦ ᒥᒍᓐᓇᖅᑐᑦ. ᑕᒪᓐᓇ ᐊᑦᑐᐃᓂᖃᖅᑐᖅ ᓄᓇᓕᓐᓄᑦ ᐅᓯᔭᐅᒍᓐᓇᖅᑐᓂᒃ ᖃᑭᒪᓇᓱᐊᕐᓂᕐᒥᓪᓗ. ᓱᐴᔫᑦ ᒥᒍᓐᓇᖅᑐᑦ ᑐᐊᐸᒧᑦ ᐊᑐᕈᓐᓃᖅᑎᑕᐅᕙᓪᓕᐊᑦᓱᑎᒃ, ᑐᐊᐸᐃᑦ ᒥᕝᕖᑦ ᓈᒻᒪᓈᖅᓯᒪᒐᓗᐊᖅᑎᓪᓗᒋᑦ ᓄᓇᕗᑦ ᓯᓚᖓᓄᑦ. Deutsche ᖃᖓᑕᔫᑦ ᒫᓐᓇ ᓴᓇᕙᓪᓕᐊᔪᑦ ᑐᐊᐸᒧᑦ ᒥᒍᓐᓇᖅᑐᓂᒃ ᑲᓇᑕᒥ.  

• ᑐᑦᑕᕐᕕᖃᕐᓂᖅ ᐃᖃᓗᓐᓂᒃ: ᖃᖓᑕᔫᑦ ᐱᔨᑦᓯᕋᖅᑐᑦ ᑐᕌᖅᑕᖃᕐᓂᐅᓴᑐᐃᓐᓇᕐᒪᑕ ᐃᖃᓗᓐᓂᒃ, ᓄᓇᓖᑦ ᐊᑯᕐᖓᓐᓂ ᐊᕐᕕᑕᕐᓂᖅ ᑕᐅᖅᓰᖃᑦᑕᕐᓂᕐᓗ ᐊᑭᑐᒋᐊᒃᑲᓐᓂᓚᕿᑦᓱᓂ ᐱᔭᕆᐊᑐᑦᓱᓂᓗ. ᑕᒪᓐᓇ ᓄᓇᕗᑦ ᑐᕌᖅᑕᕆᓯᒪᔭᖓᓂᒃ ᓯᐊᒻᒪᖅᑎᕆᓂᕐᒥᒃ ᐱᔨᑦᓯᕋᐅᑎᓂᒃ ᑲᔪᓯᑎᑦᓯᖏᑦᑐᖅ.  

• ᐃᓄᓕᖅᑕᓂᒃ ᐊᐅᓪᓚᑎᑦᓯᕐᓂᒧᑦ ᐊᑭᒋᔭᐅᔪᑦ: ᑲᓇᐃᑎᐊᓐ ᓄᐊᕐᖦ−ᑯᑦ $1.31/kg ᐊᑭᖓ ᐃᑲᔪᖅᑐᑎ ᐃᓄᒻᒥᒃ ᑭᓯᐊᓂ ᐱᖃᓯᐅᔾᔨᖏᑦᑐᖅ ᐱᓇᓱᐊᕐᕕᓐᓂᒃ, ᑮᓇᐅᔭᓕᐅᕋᓱᐊᖅᑏᑦ ᐊᐅᓪᓚᑎᑦᓯᒍᓐᓇᕐᓂᖏᓐᓂᒃ ᐱᔭᕆᐊᑦᑐᐃᑦᓱᓂ. ᖃᖓᑕᔫᓕᕆᔩᓪᓗ ᐊᐅᓚᓂᖓᑦ ᑐᑭᓕᒃ ᐃᓄᓕᖅᑕᐃᑦ ᐊᐅᓪᓚᖅᑎᑕᐅᔪᑦ ᑭᖑᕙᐅᖅᑲᒐᔪᓲᑦ, ᔭᒐᓲᑦ, ᓱᕋᓲᓪᓗᓐᓃᑦ.  

• ᑭᓪᓕᖃᖅᑐᑦ ᐊᑐᕆᐊᑦ ᐋᖅᑭᐅᒪᔾᔪᑏᑦ: ᐃᓚᖏᑦ ᐃᑲᔪᖅᑐᖅᑐᑦ ᐊᖅᑯᓯᐅᕐᒥᒃ ᑲᓱᖅᑎᑕᐅᓗᑎᒃ ᓄᓇᓕᑦ, ᑭᓯᐊᓂ ᐊᓯᖏᑦᑕᐅᖅ ᐃᓱᒫᓗᑎᓖᑦ ᐊᕙᑎᒥᒃ ᓱᕋᑦᑎᕆᓂᐅᒐᔭᖅᑐᒥᒃ.  

• ᐃᒫᒍᑦ ᐋᖅᑭᐅᒪᔾᔪᑎᓄᑦ ᐃᓱᒫᓗᑕᐅᔪᑦ: ᐅᒥᐊᒃᑯᕕᑦᑕᖃᕆᐊᒃᑲᓐᓂᕆᐊᓕᒃ ᑐᓚᑦᑕᕐᕕᓐᓂᓪᓗ ᐃᖃᓪᓕᐊᖃᑦᑕᕐᓂᕐᒧᑦ, ᐊᖑᓇᓱᓐᓂᕐᒧᑦ ᖃᑭᒪᓇᓱᐊᕈᑎᑦᓴᓄᓪᓗ ᐱᕕᑦᓴᖃᕐᓂᐅᔪᓄᑦ. ᐅᒥᐊᒃᑯᕕᖃᖅᑎᓐᓇᒍ, ᐅᒥᐊᑦ ᓱᕋᑦᑎᓴᕋᐃᓐᓂᖅᓴᐃᑦ, ᐊᑭᑦᑐᐹᓪᓕᕈᑕᐅᑦᓱᑎᒃ ᐊᖑᓇᓱᐊᕐᓂᕐᒧᑦ ᐊᑭᒋᔭᐅᔪᓄᑦ. ᓯᓈᑉ ᓯᑑᕋᖅᐸᓪᓕᐊᓂᖓ ᓄᖅᑲᐅᒥᒍᓐᓇᕐᒥᔪᖅ ᐃᒫᓂ ᐊᖅᑭᐅᒪᔾᔪᑎᑦᓴᖃᑦᓯᐊᒃᑲᓐᓂᕈᓐᓇᖅᐸᑦ.

ᖃᑭᒪᓇᓱᐊᕐᓂᕐᒧᑦ ᐊᑐᐊᒐᕐᓄᓪᓗ ᐃᓱᒪᑦᓴᖅᓯᐅᕈᑎᑦᓴᐃᑦ

ᐋᖅᑭᐅᒪᔾᔪᑏᑦ ᐱᕙᓪᓕᐊᑎᑕᐅᓂᖏᑦ ᓈᒻᒪᓈᖅᓯᒪᒋᐊᓖᑦ ᑭᙴᒪᒋᔭᐅᔪᓄᑦ ᐅᑭᐅᖅᑕᖅᒥᐅᓄᑦ ᐋᖅᑭᒋᐊᖅᑕᐅᑐᐃᓐᓇᖏᓪᓗᓂ ᐅᑭᐅᖅᑐᖅᑐᒥ ᐃᓅᓯᖅ.

ᐊᑦᓱᕉᑎᓪᓗᐊᑕᐃᑦ:

• E-ᓂᐅᕕᐊᑦᓴᐃᑦ ᖃᕆᑕᐅᔭᒃᑯᑦ: ᐋᒪᔮᓐ ᐊᑑᑎᖃᓪᓚᕆᖅᓯᒪᔪᖅ ᓄᓇᕗᒻᒥ, ᐊᑐᐃᓐᓇᖃᖅᑎᑦᓯᒍᑕᐅᑦᓱᓂ ᓱᓇᒃᑯᑎᓂᒃ ᐊᑭᓗᐊᖅᐸᒌᖅᑐᓂᒃ ᐊᑐᐃᓐᓇᐅᖏᑦᑐᓂᓪᓗᓐᓃᑦ ᓄᓇᓕᓐᓂ. ᐊᒥᓱᐃᑦ ᐃᓄᐃᑦ ᓄᓇᓕᓖᑦ ᓱᖏᖅᑑᑎᖃᖅᐸᑦᑐᑦ ᐋᒪᔮᓐᒥᒃ ᐊᑐᐃᓐᓇᐅᑎᑕᐅᙱᑦᑐᓄᑦ ᒐᕙᒪᒃᑯᑦ ᐊᐅᓚᓂᖏᑦᑎᒍᑦ.

• ᑭᙴᒪᓇᖅᑐᖅ ᐊᕐᕌᒍᒧᑦ ᐊᑕᐅᓯᐅᙱᑦᑐᒧᑦ ᑮᓇᐅᔭᐃᑦ: ᑮᑕᑲᐃᓐᓇᕐᒨᖓᔪᑦ ᑮᓇᐅᔭᐃᑦ ᐋᖅᑭᐅᒪᔾᔪᑏᓪᓗ ᐊᐅᓚᓂᐅᔪᓄᑦ ᑲᔪᓯᑦᓯᐊᕈᑕᐅᒍᓐᓇᖏᑦᑐᑦ.  

• ᐃᓕᓐᓂᐊᑎᑦᓯᓂᖅ ᐃᖅᑲᓇᐃᔮᓪᓗ: ᓄᓇᕗᒻᒥ ᐃᓕᓐᓂᐊᕐᓂᖅᑕᖃᕆᐊᒃᑲᓐᓂᕆᐊᓕᒃ ᓴᓇᔨᐅᓂᕐᒧᑦ (ᐅᐊᔭᓕᕆᔩᑦ, ᐊᐅᓚᐅᓯᕆᔨᑦ, ᖃᖓᑕᔫᖅᑏᑦ, ᖁᐊᖃᐅᓯᕆᔩᑦ) ᑲᔪᓯᑎᑕᐅᓂᐊᕐᓗᑎᒃ ᐋᖅᑭᐅᒪᔾᔪᑏᑦ ᐃᑲᔪᖅᑐᖅᑕᐅᓗᓂᓗ ᖃᑭᒪᓇᓱᐊᕐᓂᖅ. ᐃᓕᓐᓂᐊᕈᓐᓇᕐᓂᖅ ᐊᑐᐃᓐᓇᐅᑎᑕᐅᒋᐊᓕᒃ ᓄᓇᓕᓐᓂ.  

• ᐃᓪᓗᑖᕐᓂᕐᒧᑦ ᐊᑐᐊᒐᐃᑦ ᐃᓱᒫᓗᓐᓇᖅᑐᑦ: ᐃᓪᓗᓕᕆᔨᒃᑯᑦ ᓈᓴᐅᓯᖅᑐᐃᒍᓯᖏᑦ ᑐᑭᓯᓇᖏᑦᑐᑦ. ᒪᒃᑯᑦᑐᑦ, ᐃᓄᑐᐊᖅ, ᑮᓇᐅᔭᓕᐅᕈᓐᓇᖅᑑᒐᓗᐊᑦ ᐊᑦᓱᕈᕐᓇᖅᑐᒃᑰᖅᐸᑦᑐᑦ ᐃᓪᓗᑖᕋᓱᐊᖅᓱᑎᒃ. ᐊᒥᓲᓂᖅᓴᓂᒃ ᖃᓄᐃᑦᑐᑐᐃᓐᓇᕐᓂᒃ ᐃᓪᓗᑕᖃᕆᐊᓕᒃ ᐊᔾᔨᒌᙱᑦᑐᓂᒃ ᐊᒥᓲᓂᓕᓐᓄᑦ ᐃᓚᒌᓐᓄᑦ.  

• ᓯᓚᑖᓂ ᖃᓄᖅᑑᖅᑏᑦ: ᐊᒥᓱᑦ ᐊᑐᐊᒐᓕᐅᖅᑏᑦ ᓄᓇᖃᖅᑐᑦ ᖃᓪᓗᓈᓂ ᑭᓯᐊᓂ ᖃᓄᖅᑑᖅᑎᐅᕙᑦᑐᑦ ᓄᓇᕗᒻᒥᐅᓄᑦ. ᑕᒪᓐᓇ ᑎᑭᐅᑎᒍᑕᐅᕙᑦᑐᑦ ᐊᑐᐊᒐᕐᓄᑦ ᐊᑦᑐᐊᓂᖃᙱᑦᑐᓄᑦ ᓄᓇᓕᓐᓂ ᐊᑑᑎᓪᓚᕆᑦᑐᓄᑦ, ᑭᓯᐊᓂᓕ, ᐊᒥᓲᓂᖅᓴᐃᑦ ᐅᖃᖃᑎᒌᓐᓂᐅᔪᑦ ᒫᓐᓇ ᐃᓱᒪᖃᖃᓯᐅᑎᕙᓕᖅᑐᑦ ᓄᓇᓕᓐᓂ ᐃᓱᒪᓕᒋᔭᐅᔪᓂᒃ, ᐊᑲᐅᓂᖅᓴᒧᑦ ᑐᕌᓕᖅᓱᑎᒃ.  

• ᐊᑦᑐᐃᓂᖏᑦ ᓴᓐᓇᕖᑦ ᐅᓇᓖᓪᓗ: ᐅᔭᕋᕐᓂᐊᕐᓂᖅ, ᐆᒪᔪᓕᕆᓂᖅ, ᐳᓚᕋᑦᑐᓕᕆᓂᖅ, ᐊᒻᒪᓗ ᐅᓇᓖᑦ ᑮᓇᐅᔭᖅᑑᑎᖏᑦ ᐋᖅᑭᑦᓱᐃᔪᑦ ᐋᖅᑭᐅᒪᔾᔪᑏᑦ ᐱᕙᓪᓕᐊᓂᖏᓐᓂᒃ. ᐃᓚᖏᑦ ᓄᓇᓖᑦ ᐃᑲᔪᖅᑐᖅᑐᑦ ᑖᒃᑯᓂᖓ ᐊᓯᔾᔨᕐᓂᐅᔪᓂᒃ, ᐊᓯᖏᓪᓗ ᐃᓱᒫᓗᑎᖃᖅᓱᑎᒃ.  

ᓯᕗᓂᕐᒥ ᑎᓕᓯᔾᔪᑕᐅᔪᑦ ᐊᒻᒪᓗ ᓄᓇᓕᓐᓂ ᓯᕗᓪᓕᐅᑎᑕᐅᔪᑦ

ᓄᓇᕗᒻᒥᐅᑦ ᑐᑭᓯᓇᑦᓯᐊᖅᑐᓂᒃ ᓯᕗᓪᓕᐅᔾᔨᓯᒪᔪᑦ ᓯᕗᓂᑦᓴᒧᑦᒪ ᑐᕌᖅᑕᖃᖅᓱᑎᒃ ᓄᓇᓕᓐᓂᒃ ᓯᕗᓕᖅᑕᐅᔪᓂᒃ ᖃᓄᖅᑑᕈᑎᓂᒃ, ᐋᖅᑭᐅᒪᔾᔪᑎᓂᒃ ᐱᔨᑦᓯᖅᑐᓂᒃ ᓄᓇᓕᓐᓂ ᑭᙴᒪᒋᔭᐅᔪᓂᒃ, ᓴᙱᓂᖅᓴᒥᓪᓗ ᐃᑲᔪᖅᑐᕐᓂᖅ ᖃᐅᔨᒪᓂᑐᖃᕐᒥᒃ ᓂᕿᑦᓴᖃᑦᓯᐊᕐᓂᕐᒨᖓᔪᒥᒃ.

ᐱᕚᓪᓕᕈᑕᐅᒍᓐᓇᖅᑐᑦ:

• ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᕈᖅᐸᓪᓕᐊᑎᑦᓯᓂᖅ: ᐃᑲᔪᖅᑐᕐᓗᒋᑦ ᐃᓄᓐᓄᑦ ᓯᕗᓕᖅᑕᐅᔪᑦ ᐊᐅᓚᓃᑦ ᐊᖏᓪᓕᒋᐊᕆᔪᑦ ᐃᓅᓯᕐᒥ ᑲᓲᒪᓂᕐᒨᖓᔪᓂᒃ, ᑐᑭᒧᐊᑦᑎᑦᓯᒋᐊᑦᓯᐊᕐᓗᑎᒃ ᐊᖑᓇᓱᓐᓂᐅᒍᓐᓇᖅᑐᓂᓪᓗ, ᓴᙱᓕᖅᐹᓪᓕᑎᑦᓯᓗᑎᓪᓗ ᓂᕿᑦᓴᖃᑦᓯᐊᕐᓂᕐᒥᒃ.  

• ᓄᓇᕗᒻᒥ ᑐᙵᕕᖃᖅᑐᑦ ᐸᕐᓇᓐᓃᑦ: ᐊᓚᒡᒐᐃᓐᓂᖃᕆᐊᒃᑲᓐᓂᕐᓗᑎᒃ ᖃᓄᖅᑑᖅᑏᑦ. ᐊᒥᓱᑦ ᓄᓇᓕᓖᑦ ᐃᓱᒪᖃᕐᒪᑕ ᐊᐅᓚᑦᓯᙱᓗᐊᕆᐊᑦᓴᖅ ᓯᕗᓂᑦᓴᒥᓂᒃ, ᑎᑭᐅᑎᒍᑕᐅᓕᖅᓱᓂ ᓱᖁᑎᑦᓴᖏᓐᓂᕐᒧᑦ.

• ᓱᓇᑐᐃᓐᓇᕐᓄᑦ ᐊᑐᖅᑐᑦ ᐋᖅᑭᐅᒪᔾᔪᑏᑦ: ᓴᓇᔭᐅᓗᑎᒃ ᐃᓪᓗᐃᑦ ᓱᓇᑐᐃᓐᓇᕐᓄᑦ ᐊᑐᕈᓐᓇᖅᑐᑦ, ᓲᕐᓗ ᐅᒥᐊᒃᑯᕖᑦ ᑕᒪᒃᑮᓐᓄᑦ ᐃᖃᓗᒐᓱᐊᖅᑎᓄᑦ ᐊᖑᓇᓱᐊᖅᑎᓄᓪᓗ, ᓯᕐᓗᐊᖃᐅᕐᓗᑎᒃ ᓴᓐᓇᕕᓐᓂᒃ, ᐊᑐᕆᐊᓕᐅᕐᓗᑎᓪᓗ ᐊᖑᓇᓱᕝᕕᒻᒧᑦ ᐃᖏᕐᕋᕕᑦᓴᓂᒃ.  

• ᑲᔪᓯᑦᓯᐊᓂᖅᓴᐅᓗᑎᒃ ᖃᖓᑕᔫᑦ: ᐱᕚᓪᓕᖅᑎᑕᐅᓗᑎᒃ ᓯᕗᒧᑦᑎᑦᓯᒍᑏᑦ, ᓯᓚᓐᓂᐊᕈᑏᑦ, ᐊᒻᒪᓗ ᐃᓱᒪᒋᔭᐅᓗᓂ ᐊᐃᑉᐸᐃᖃᕐᓂᖅ ᐅᓯᒋᐊᓕᓐᓂᒃ ᐅᓯᔨᑐᐃᓐᓇᕐᒥᒃ.  

• ᓱᐴᔫᕐᓄᑦ ᐱᔨᑦᓯᖅᑕᐅᓂᖅᓴᐅᓗᑎᒃ: ᐊᒥᓱᑦ ᓄᓇᓖᑦ ᐱᔨᑦᓯᖅᑕᐅᒍᒪᔫᒐᓗᐊᑦ ᓱᐴᔫᕐᓄᑦ ᖁᐊᖅᑎᑕᒐᕐᒥᓪᓗ ᒥᕝᕕᖃᕐᓗᑎᒃ ᐱᕚᓪᓕᖁᓪᓗᒍ ᐊᕐᕕᑕᕐᓂᖅ, ᐋᓐᓂᐊᖅᑐᓕᕆᓂᕐᒥᒃ ᐊᑐᐃᓐᓇᖃᕐᓂᖅ, ᖃᑭᒪᓇᓱᐊᕈᑎᑦᓴᐃᓪᓗ.  

• ᐊᖏᓪᓕᒋᐊᕆᓂᖅ ᐃᓄᓕᖅᑕᓅᖓᔪᓂᒃ ᑲᓲᒪᓂᐅᔪᓂᒃ: ᐃᓄᓕᖅᑕᓕᕆᕕᒃ ᐃᓪᓗ ᐃᑲᔪᖅᓯᒐᔭᖅᑐᖅ ᐃᖃᓗᓐᓂ ᐱᕚᓪᓕᖅᑎᑕᐅᓗᑎᒃ ᐊᐅᓪᓚᖅᑎᑕᐅᕙᑦᑐᑦ ᒥᑭᓪᓕᑎᕆᒍᑕᐅᓗᑎᓪᓗ ᓱᓇᒃᑯᑖᖃᐅᑏᓐᓂᐊᕐᓂᕐᒥᒃ. ᐊᐃᑉᐸᐃᖃᖅᐸᑕ ᖃᖓᑕᔫᓂᒃ ᓂᕿᓕᕆᔨᓂᒃ ᒥᑭᓪᓕᑎᕆᒐᔭᖅᑐᖅ ᓂᕿᑦᓴᖃᑦᓯᐊᖏᓐᓂᕐᒥᒃ. ᐊᖑᓇᓱᓐᓂᖅ ᑮᓇᐅᔾᔭᑦᓴᕈᑕᐅᒍᓐᓇᓕᖅᐸᑦ ᐃᑲᔪᖅᓯᒐᔭᕐᒥᔪᖅ ᐃᓄᓕᖅᑕᓂᒃ ᐊᑐᐃᓐᓇᖃᕐᓂᕐᒥᒃ.  

ᓄᖅᑲᐅᓯᖅ

ᓄᓇᕗᒻᒥᐅᑦ ᐋᖅᑭᐅᒪᔾᔪᑎᖃᕈᒪᔪᑦ ᐃᑲᔪᖅᑐᖅᑐᒥᒃ ᓄᓇᓕᓐᓂᒃ, ᐱᖅᑯᓯᖓᓐᓂᒃ, ᖃᑭᒪᓇᓱᐊᕐᓂᕐᒥᓪᓗ. ᖃᓄᖅᑑᖅᑏᑦ ᓈᓚᒋᐊᓖᑦ ᓄᓇᓕᓐᓂ ᓂᐱᒋᔭᐅᔪᓂᒃ, ᑮᓇᐅᔭᖅᑑᑎᖃᕐᓗᑎᒃ ᓂᕿᑦᓴᖃᑦᓯᐊᓂᕐᒥᒃ, ᓴᖅᑮᓗᑎᓪᓗ ᐃᖏᕐᕋᔾᔪᑎᓄᑦ ᐊᐅᓚᔾᔪᐅᑎᓂᒃ ᑲᔪᓯᑦᓯᐊᖅᑐᓂᒃ ᐃᓄᓐᓄᑦ ᓱᖏᖅᑑᑎᓕᓐᓄᑦ. ᓴᙱᓕᖅᐹᓪᓕᑎᑦᓯᓂᖅ ᑖᒃᑯᓂᖓ ᐊᐅᓚᓂᐅᔪᓂᒃ ᐃᑲᔪᕐᓂᐊᖅᑐᖅ ᖃᐅᔨᓴᑦᓯᐊᕈᑕᐅᓗᓂ ᓇᒻᒥᓂᖅ ᒪᑭᒪᒍᓐᓇᕐᓂᕐᒥᒃ ᑲᓲᒪᓗᓂᓗ ᓄᓇᕗᑦ ᑭᖑᕚᑦᓴᕆᔭᐅᔪᓄᑦ.